Kaixo antolatzaile,

Taupaka elkarteko sortzaileok urtero, ehundaka kontzertu, ikuskizun eta antzezlan eskaintzen ditugu. Hoietan guztietan, antolatzaile edo programatzaileekin elkarlanean aritzen gara, guztion onerako baldintzak eta bermeak finkatzeko. Gure esperientzian oinarrituta eta eredu kulturalaren eraldaketaren bidean, hauek dira azpimarratzen ditugun irizpideak:

Gardentasun ekonomikoa

Zuzenean antolatzaile eta programatzaileekin hartu emanetan aritzen gara, bitartekaririk gabe, kudeaketa ekonomiko gardena eta argia bideratzeko. Aurrekontu zehatzak, sorpresarik gabekoak, irizpide finkoak eta prezio egokiak izatea lehenesten dugu.

Baldintza duinak

Sortzaileok gure ikuskizunak eskaintzera goazenean baldintza duinak behar ditugu. Horretarako, antolatzaile eta sortzaileon arteko harremana eta elkarrizketa behar-beharrezkoa iruditzen zaigu, alde bien arteko ulermena erraztu eta helburuak asetzeko asmoaz.

Lizentzia askeak

Taupaka Elkarteko sortzaileok kultura askean sinisten dugu. Gure lanak argitaratu edota zabaltzeko (musika, ikusentzunezkoak, literatura, antzezlanak, eta abar) creative commons lizentzia askeak aukeratzen ditugu. Ondorioz, gure ikuskizunak kontratatzen duzuenok ez diozue SGAE bezalako egile eskubideen kudeaketa elkarte pribatuei dirurik eman behar.